حلیم عادل شیخ نے کہا کہ تحریک عدم اعتماد پر رائے شماری سے قبل ہی اپوزیشن بھاگ جائے گی۔
وزیر اعظم آزاد جموں و کشمیر سردار عبدالقیوم نیازی سے اپوزیشن لیڈر سندھ اسمبلی حلیم عادل شیخ نے ملاقات کی جس میں ملک کی مجموعی سیاسی صورت حال پر تبادلہ خیال کیا گیا۔سردارعبد القیوم نیازی نے کہا کہ اپوزیشن ذاتی مفاد کی جنگ لڑ رہی ہے اور سیاسی بلیک میلنگ کے ذریعے این آر او حاصل کرنے کی ناکام کوشش کر رہی ہے، وزیر اعظم عمران خان پاکستان کے مفاد اور پاکستانی عوام کی خوشحالی کے لئے کام کر رہے ہیں۔انہوں نے کہا کہ عمران خان نے پاکستان میں اسٹیٹس کو توڑا اور ملک کے اندر تعمیر و ترقی کے نئے دور کا آغاز کیا، آج پاکستان ترقی اور خوشحالی کی منزل کی طرف گامزن ہے اپوزیشن کو پاکستان کی ترقی اور عوام کی خوشحالی ہضم نہیں ہو رہی۔وزیراعظم آزاد جموں وکشمیر نے کہا کہ وزیراعظم عمران خان نہ صرف پاکستانی عوام بلکہ امت مسلمہ کے بھی لیڈر ہیں، عمران خان کو یہ اعزاز حاصل ہے کہ آج انہیں امت مسلمہ اپنا لیڈر مانتی ہے۔سردار عبد القیوم نیازی نے کہا کہ وزیراعظم پاکستان عمران خان سرخرو ہونگے اور اپوزیشن کو منہ کی کھانی پڑے گی۔حلیم عادل شیخ نے کہا کہ متحدہ اپوزیشن چوروں کا ٹولہ ہے جو احتساب کے خوف سے اکھٹے ہیں اور عمران خان کو بلیک میل کرنے کی ناکام کوشش کر رہے ہیں، تحریک عدم اعتماد پر رائے شماری سے قبل ہی اپوزیشن بھاگ جائے گی۔اپوزیشن لیڈر سندھ اسمبلی حلیم عادل شیخ نے کہا کہ وزیر اعظم عمران خان کو پاکستان کےعوام کا اعتماد حاصل ہے، اسلام آباد میں 27مارچ کو تاریخی جلسہ ہوگا، پوری قوم عمران خان کے ساتھ کھڑی ہے قوم نے اپوزیشن کو مسترد کر دیا ہے۔ Adsence Ads 300X250
