اسلام آباد: سیاسی جماعتوں کے اتحاد پاکستان ڈیموکریٹک موومنٹ (پی ڈی ایم ) کے سربراہ اور امیر جمعیت العلمائے اسلام (ف) مولانا فضل الرحمان کی ہدایت پر ملک بھر کے مختلف شہروں میں ہونے والے احتجاج کے باعث اہم شاہراہیں بند کردی گئی ہیں جس کی وجہ سے گاڑیوں کی لمبی قطاریں لگ گئی ہیں۔
ہم نیوز کے مطابق شہر قائد کے تین داخلی اہم شاہراہوں پر جے یو آئی کارکنان کا احتجاج جاری ہے جس سے ٹریفک کی روانی متاثر ہوگئی ہے۔
احتجاج کی وجہ سے سپر ہائی وے الآصف اسکوائر، حب ریور روڈ، نیشنل ہائی وے اور اسٹیل ٹاؤن پر مسافر بسوں، ہیوی ٹریفک اور گاڑیوں کی لمبی قطاریں لگ گئی ہیں۔
سکھر میں جے یو آئی کے کارکنوں نے قومی شاہراہ پنوعاقل پر دھرنا دیا ہے۔ کارکنان پریس کلب کے سامنے دھرنا دے کر بیٹھ گئے ہیں۔
ہم نیوز کے مطابق دادو میں کارکنان نے جوہی موڑ پر انڈس ہائی وے کو بلاک کردیا ہے جب کہ دھرنے سے لاڑکانہ، کراچی جانے والی ٹریفک معطل ہوگئی ہے۔ احتجاج کی وجہ سے انڈس ہائی وے پر گاڑیوں کی قطاریں لگ گئی ہیں۔
حیدرآباد اور نوشہرفیروز میں بھی جے یو آئی کی جانب سے دھرنا دیا گیا ہے۔ نوشہروفیروز قومی شاہرہ پر بند ہونے کے باعث سندھ پنجاب کی ٹریفک معطل ہوگئی ہے۔
سوات میں جے یو آئی کے کارکنوں نے نشاط چوک مینگورہ میں مظاہرہ کیا ہے جب کہ خضدار میں بھی جے یو آئی کے کارکنان قومی شاہراہ پر جمع ہوئے ہیں۔
امیر جے یو آئی کی اپیل پر مانسہرہ میں ہزارہ ایکسپریس وے پر احتجاج کیا گیا۔ کارکنوں نے اچھڑیاں کے قریب ہزارہ ایکسپریس وے ٹریفک کے لیے بند کردی ہے۔
وفاقی دارالحکومت اسلام آباد میں بھی مولانا فضل الرحمان کی کال پردرجنوں کارکنان پارلیمنٹ لاجز پہنچے ہیں۔
کوئٹہ میں مولانافضل الرحمان کی کال پرپارٹی کارکنوں نے منان چوک پر احتجاج کیا اور ٹائر جلا کر جناح روڈ بلاک کردی۔
حب بائی پاس اور اوتھل کے مقام پر بھی جے یو آئی کا احتجاج جاری ہے جس سے کراچی کوئٹہ شاہراہ بند ہوگئی ہے۔
جے یو آئی کے احتجاج کے باعث جہلم، اٹک چکوال پولیس کو ہائی الرٹ کردیا گیا ہے۔ اضافی نفری اہم پبلک مقامات اور شاہراہوں پر تعینات کی جائے گی، مری روڈ، فیض آباد، شمس آباد، صدر میں بھی اضافی نفری تعینات ہو گی۔
جے یو آئی کے غنڈوں نے پارلیمنٹ لاجز پر حملہ کیا، فضل الرحمان پر پرچہ ہونا چاہیے: فواد چودھری
ہم نیوز کے مطابق حویلیاں میں بھی جے یو آئی کے کارکنان نے احتجاج کیا ہے جس کی وجہ سے شاہراہ ریشم بلاک ہو گئی ہے۔ شاہراہ کے بند ہونے کی وجہ سے ٹریفک جام ہو گیا ہے۔
