پاکستان اور آسٹریلیا کے مابین راولپنڈی ٹیسٹ کے لئے ٹیموں کی آمدوروفت کو محفوظ بنانے کے لئے ٹریفک پلان ترتیب دے دیا گیا۔ سی ٹی او راولپنڈی نوید ارشاد کے مطابق یہ پلان 27 فروری سے دونوں ٹیموں کے درمیان پریکٹس میچ اور 4 سے 8 مارچ تک ہونیوالے ٹیسٹ میچ کے دوران لاگو ہوگا۔
کرکٹ میچز کے دوران ٹریفک پولیس کے 350 اہلکارخصوصی ڈیوٹی کے فرائض سر انجام دیں گے۔سی ٹی او کے مطابق ٹریفک پلان کے تحت دوران میچ اسٹیڈیم روڈ 9 ڈبل روڈ تک دونوں اطراف سے مکمل طور پر بند رہے گی، جس کے باعث اسلام آباد سے ڈبل روڈ آنے والی ٹریفک فیض آباد سے ایکسپریس وے اور مری روڈ استعمال کر سکے گی۔ ترجمان ٹریفک پولیس کے مطابق 9 ڈبل روڈ براستہ آئی جے پی روڈ، پنڈورہ چورنگی ،کٹاریاں، کیرج فیکٹری ،پیرودھائی موڑ ،چک مدد سے راولپنڈی میں داخل ہو سکے گی۔راولپنڈی سے براستہ ڈبل روڈ 9 ایونیو اسلام آباد جانے والی ٹریفک فیض آباد سے اسلام آباد میں داخل ہوسکے گی۔ترجمان ٹریفک پولیس کے مطابق کرکٹ ٹیموں کی روانگی اور واپسی کے وقت مری روڈ کو فیض آباد سے ڈبل روڈ تک مکمل طور پر بند کیا جائے گا اور اس دوران اسلام آباد سے آنے والی ٹریفک کو فیض آباد سے ایکسپریس وے کی جانب ڈائیورٹ کیا جائے گا۔راولپنڈی سے اسلام آباد جانے والی ٹریفک کو 6 روڈ سے سیدپور روڈ کی طرف موڑا جائیگا جبکہ غوثیہ چوک سے آنے والی ٹریفک کو براستہ فاروق اعظم روڈ، کری روڈ کی طرف موڑدیا جائے گا۔ترجمان ٹریفک پولیس کے مطابق دوران میچز شہریوں کی سہولت کےلئے اہم شاہراہوں پرمتبادل راستوں کے متعلق آگاہی بینرز آویزاں کردیے گئے ہیں۔واضح رہے کہ پنڈی ٹیسٹ کے لیے سیکیورٹی انتظامات کو بھی حتمی شکل دیدی گئی ہے۔آسٹریلیا کی ٹیم 24 سال کے طویل عرصے بعد پاکستان کے دورے پر آرہی ہے۔ Adsence Ads 300X250
